មន្ត្រីតុលាការខេត្តក្រចេះ ប្រឈមមុខដាក់គ្នារឿងជំនួញឈើប្រណីតខុសច្បាប់
26-August-2016 | ដោយ មែន កំសត់
ប្រជាពលរដ្ឋក្នុងខេត្តក្រចេះ កំពុងតាមដានដោយយកចិត្តទុកដាក់ទៅលើសំណុំរឿងព្រះរាជអាជ្ញាអមសាលាដំបូងខេត្តក្រចេះ ចាត់វិធានការបង្ក្រាបរថយន្តដឹកឈើប្រណីតខុសច្បាប់របស់ព្រះរាជអាជ្ញារងម្នាក់ និងឃាត់ខ្លួនជនសង្ស័យម្នាក់ទៀតយកទៅស្នាក់ការកងរាជអាវុធហត្ថ កាលពីយប់ថ្ងៃទី២៤ ខែសីហា ឆ្នាំ២០១៦។ តាមការអះអាងពីសមត្ថកិច្ចតូចតាចមួយចំនួនក្នុងខេត្តក្រចេះ បានឲ្យដឹងថា ការប្រឈមមុខដាក់គ្នារវាងលោក ធុច បញ្ចសន្តិភាព ព្រះរាជអាជ្ញាអមសាលាដំបូងខេត្តពោធិ៍សាត់ និងលោក សោរ វុទ្ធី ព្រះរាជអាជ្ញារងអមសាលាដំបូងខេត្តក្រចេះ អាចជាប់ពាក់ព័ន្ធទៅនឹងផលប្រយោជន៍ពាក់ព័ន្ធជំនួញឈើប្រណីតខុសច្បាប់។ ដូច្នេះអភិបាលខេត្តក្រចេះ លោក សរ ចំរ៉ុង ក៏ដូចជាក្រសួងនិងស្ថាប័នពាក់ព័ន្ធ គួរពិនិត្យមើលភាពមិនប្រក្រតីក្នុងស្ថាប័នតុលាការខេត្តក្រចេះផងដែរ។
ប្រភពពីមន្ត្រីកងរាជអាវុធហត្ថស្រុកស្នួល ខេត្តក្រចេះ បានឲ្យដឹងថា កាលពីម៉ោង១១យប់ថ្ងៃទី២៤ ខែសីហា ឆ្នាំ២០១៦ ព្រះរាជអាជ្ញាអមសាលាដំបូងខេត្តក្រចេះ បានដឹកនាំកម្លាំងសមត្ថកិច្ចមួយចំនួនឃាត់រថយន្តដឹកឈើ១គ្រឿងដែលសង្ស័យថា ជារបស់លោក សោរ វុទ្ធី ព្រះរាជអាជ្ញារងនៃសាលាដំបូងខេត្តក្រចេះ។ នៅក្នុងប្រតិបត្តិការនោះមានការឃាត់ខ្លួនមន្ត្រីយោធាម្នាក់ នៅចំណុចផ្អាក ក្នុងភូមិស្នួល ឃុំស្នួល ស្រុកស្នួល ខេត្តក្រចេះ ហើយបញ្ជូនទាំងមនុស្សទាំងវត្ថុតាងទៅទីបញ្ជាការកងរាជអាវុធហត្ថស្រុកស្នួល ដើម្បីចាត់ការតាមនីតិវិធី។ វត្ថុតាងដែលបង្ក្រាបបានរួមមាន រថយន្ត១គ្រឿងដឹកឈើសុក្រំមានមុខកាត់ខ្នាតធំៗពី០.៣០ទៅ០.៥០ម៉ែត្រនិងប្រវែងបណ្ដោយ៣ម៉ែត្រ ហើយមានការរៀបចំសំណុំបែបបទបញ្ជូនឈើទៅមន្ត្រីរដ្ឋបាលព្រៃឈើ ដើម្បីចាត់ការផងដែរ។
មន្ត្រីរាជការក្នុងខេត្តក្រចេះ បានឲ្យដឹងថាការដែលលោក ធុច បញ្ចសន្តិភាព ព្រះរាជអាជ្ញាអមសាលាដំបូងខេត្តពោធិ៍សាត់ បង្ក្រាបជំនួញឈើប្រណីតខុសច្បាប់របស់លោក សោរ វុទ្ធី ជាព្រះរាជអាជ្ញារងគ្មានអ្វីក្រៅពីទំនាស់ផលប្រយោជន៍នោះទេ គឺសង្ស័យលោក សោរ វុទ្ធី មិនយល់ពីសេចក្ដីត្រូវការរបស់ចៅហ្វាយនាយ។ ឈើសុក្រំដែលលោក ធុច បញ្ចសន្តិភាព ដឹកនាំកម្លាំងសមត្ថកិច្ចបង្ក្រាបទាំងពាក់កណ្ដាលយប់នោះ គឺគេដឹកចេញពីចំណុចភូមិ១០៥ថ្មី ស្រុកចិត្របុរី ខេត្តក្រចេះ បម្រុងនាំចេញទៅស្រុកយួនតាមច្រកដេ២ ស្រុកស្នួល ខេត្តក្រចេះ។ ទន្ទឹមនឹងនេះសមត្ថកិច្ចពាក់ព័ន្ធនៅខេត្តក្រចេះ បានឲ្យដឹងថា លោក សោរ វុទ្ធី បានធ្វើជាខ្នងបង្អែករបស់ឈ្មួញដឹកជញ្ជូនឈើប្រណីតទៅស្រុកយួនជាយូរមកហើយ ប៉ុន្តែដោយសារទំនាស់ផលប្រយោជន៍ទើបលោក ធុច បញ្ចសន្តិភាព ចាត់វិធានការបង្ក្រាបយកស្នាដៃបង្ហាញថ្នាក់លើតែម្តង៕
ចំនួនអ្នកទស្សនា
- ថ្ងៃនេះ4401
- ម្សិលមិញ4851
- សប្តាហ៍នេះ27261
- ខែនេះ137841
- ឆ្នាំនេះ740021
- សរុប21182477